Girtiyê nexweş Îsmet Çardak ê ku bi hinceta "ji bo ewlehiya gel xeternak e" demek dirêj berdana wî hatibû taloqkirin û 15 roj berê bi kursiya biteker hatibû berdan, ji ber qeyrana dil jiyana xwe ji dest da.
Li Şirnexê 6 kesên ku hatin binçavkirin, serbest hatin berdan.
Kesê ku li navçeya Kocasînan a Kayseriyê bi çekê êriş biribû ser wesayîta hilbijartinê ya DEM Partiyê, serbest hat berdan.
Li bejahiya başûrê Dêrezorê kesên nasnameya wan nediyar jinên ku kuvarkên çolê berhev dikirin gulebaran kirin û 3 jin hatin qetilkirin.
Hevserokê Giştî yê DBP’ê Keskîn Bayindir ku beşdarî vekirina buroya hilbijartinê ya DEM Partiyê ya Şirnexê bû got: “Gava em Newroza xwe pîroz bikin, gava di 31’ê Adarê de biçin ser sindoqan, em ê vê talan û dijminatiyê bi bîr bînin. Em ê mohra xwe li azadiyê bixin û bi ser bikevin."
Xebatên hilbijartinê yên DEM Partiyên li gelek bajaran berdewam kirin û gel eleqeyeke mezin nîşan da. Hevseroka Giştî ya DBP’ê Çîgdem Kiliçgun Uçar di hevdîtina bi jinan re de got: “Her ku jin azad dibe, îktîdarê bêhtir qels dibe û dê winda bike.”
Çukurova TUAY-DER, ÎHD, OHD û ÇHD’ê di Nobeta Edaletê de daxuyanî dan û bang li dewlet û rayedaran kirin ku daxwazên girtiyan qebûl bikin û dawî li tecrîd û binpêkirinên li hemû girtîgehan bînin.
Girtiyê nexweş û siyasî Cemal Narhanci piştî ku cezayê lê hate birîn xelas kir, piştî 30 salan hate berdan. Narhanci, dema gihişt bajarê xwe Qersê ax maçî kir.
Şaxa ÎHD’ê ya Dîlokê ji bo endama wan parêzer Şuheda Ronahî Çîfçî ya piştî hedef hate nîşandan hate girtin, bê berdan bang kir.
Balafira bi tîpa NF-5 ku ji bo perwerdê ji 3’yemîn Baregeha Jet a Bingehîn ji bo perwerdê rabû, dema dadiket, kete xwarê. Pîlot bi peraşutê xwe avêt û xelas bû. Li şantiyeya ku balafir lê ket leşkerekî jiyana xwe ji dest da.
Wezîrê Karên Derve Hakan Fîdan, Wezîrê Parastinê Yaşar Guler û Musteşarê MÎT’ê Îbrahîm Kalin têkildarî operasyona derveyî sînor ku li dijî Qendîlê tê plankirin, ji li ser hevkariyê bi rayedarên Iraqê re hevdîtinê bikin çûn Bexdayê.
Hat zanîn ku li Girtîgeha Hejmar 2 ya bi Ewlekariya Bilind a Amedê bi ser qawîşan de hate girtin û sepanên “rabe-rûnê” û “solên xwe derxîne” li girtiyan hatiya ferzkirin.
Namzeta hevşaredariyê ya DEM Partiyê ya Bajarê Mezin a Enqereyê Gultan Kişanak peyamek şand û wiha got: "Li paytextê xizmet tune ye, vîzyon tune ye, mîsyon tune ye. Her ku namzet sozan didin xwe bêhtir dihetikînin."
Girtiyê bi navê Feyyaz Başak ku li Girtîgeha Hejmar 2 ya bi Ewlekariya Bilind a Xarpêtê tê ragirtin, da zanîn ku girtiyên dikevin greva birçîbûnê de hucreyê de tên ragirtin û banga hestiyariyê li raya giştî kir.
Huseyîn Beyoglû yê AKP’î ku YSK’ê tayînî Şaredariya Rezanê kiribû û navê wî bi talan, bertîl û nelirêtiyan di rojevê de ye, ji ewil dişa xwe weke cîgira şaredar tayîn kiribû û niha jî kurê xwe weke xebatkar girt şaredariyê.