ENQERE- KESK ku têkildarî tunekirina çekan daxuyanî da, diyar kir ku ew ê tevkariyê li aştiyê bikin û gavên ku divê bên avêtin daxuyand. 

 

Konfederasyona Sendîkayên Kedkarên Cemaweriyê (KESK), têkildarî merasîma tunekirina çekan a Koma Aştî û Civaka Demokratîk de, daxuyaniyeke bi nivîskî belav kir. Di daxuyaniyê de hat destnîşankirin ku perwerdehiya bi zimanê dayikê, daxwazên xizmeta cemaweriyê û demokratîkbûyîn parçeyeke pêvajoyê ne. 

 

Di daxuyaniyê de hat bilêvkirin ku ew girîngiyê didin wê yekê ku pêvajo tenê di parlamentoyê de neyê asêkirin, divê rêzistinên demokratik û ked-pişeyî jî gotina xwe bejin û her tişt bi zelalî bi civakê re bê parvekirin. 

 

DAXWAZ

 

Di berdewamiya daxuyaniyê gavên ku divê li gor pêdiviyên pêvajoyê bên avêtin wiha hatin rêzkirin: 

 

"* Divê hemû kedkarên cemaweriyê yê bi KHK'ê hatine îxrackirin vegerin ser karê xwe û tazminata wan bê dayîn, 

 

* Divê Peymana Stenbolê careke din bê pêkanîn, 

 

* Divê mafê perwerdehiya bi zimanê dayikê yê di xizmeta cemawerî û perwerdehiyê de di asta destura bingehîn de bê naskirin, 

 

* Divê dawî li rejîma qeyûm bê û rêveberiyên xwecihî ji vîna gel re bê hiştin, 

 

* Divê hiqûqa îstisnaî ya di heyama pevçûnî de serwer bû bê rakirin û dewleta hiqûqê ji nû ve bê avakirin."