Înîsiyatîfa Yekîtiya Demokratîk, bi dirûşmeya "Bi yekîtîyê ber bi aştiyê ve", dê di 26'ê Tîrmehê de li navçeya Bazîd a Agiriyê konferanseke bi navê "Girîngiya yekîtiya neteweyî ya kurd" li dar bixe. Hevberdevkên înîsiyatîfê Gulcan Kaçmaz Sayyigît û Mehmet Kamaç û her wiha Leyla Zana, İkbal Durre, Cemile Turhallı, Gultan Kişanak, Faik Bulut û Hasan Ozguneş dê wekî axaftvan beşdar bibin. Danezana endamê ya konferansê dê di 27'ê Tîrmehê de li Tirba Ehmedî Xane were xwendin. Yekîtî dê li Mêrdînê jî konferansekê li dar bixe. Cih û dîroka konferansê dê di rojên pêş de were eşkerekirin.

 

Di konferansên ku dê li du cihan werin lidarxistin de, dê li ser mijarên yekîtiya di navbera kurdan de, pêşketinên li Rojhilata Navînê û helwesta ku divê kurd li hember van pêşketinan bigirin, nîqaş werin kirin.

 

'KONFERANS JI BO YEKÎTIYÊ GIRÎNG E'

 

Ji Înîsiyatîfa Yekîtiya Demokratîk Orhan Ayaz diyar kir ku ew li bendê ne ku zêdetirî hezar kes beşdarî konferansê bibin û got ku konferans ji bo yekîtiya di navbera kurdan de girîng e.

 

DÊ LI SER PÊVAJOYÊ BÊ SEKINANDIN

 

Ayaz destnîşan kir ku di konferansê de dê li ser pêvajoya çareserkirina pirsgirêka kurd were axaftin û got: "Armanca konferansê ew e ku yekîtî û tifaqa di navbera kurdan de pêş bikeve. Pêvajoyek li pêşiya me ye. Divê rêya siyaseta demokratîk ji bo pêvajoya avakirina aştiyê were vekirin. Piştî peyama bidîmen ya birêz Ocalan, biryara fesixkirinê û şewitandina çekan, hemû çav li ser gavên dewletê ne. Pêdivî bi gavên bilez heye. Ev mijar dê di konferansa me de cihekî girîng bigire. Di konferansê de, em ê li bersivên pirsên 'kurd çi dixwazin? Pirsgirêka kurd çawa dikare bi rêbazên demokratîk were çareserkirin?' bigerin."

 

'ME HER KES VEXWENDE KONFERANSÊ'

 

Ayaz bal kişand ser israra Rêberê Gelê Kurd Abdullah Ocalan a li ser siyaseta demokratîk û got: "Birêz Ocalan û PKK hemû pêdiviyên pêvajoyê pêk tînin. Ew bi cidî têkoşîna aştiyê dimeşînin. Ji bo ku pêvajo bi serkeftî bi encam bibe, divê dewlet bi heman cidiyetê nêzî wê bibe. Di pêvajoya 2013'an de, kurdan careke din bi cidî ev yek şopand, lê berevajî vê, dewletê helwesteke bêserûber nîşan da. Em dikarin gelek derfetan pêşkêş bikin, ji têkiliyên dîplomatîk bigire heya civînên gel û serdanên derî bi derî. Ji ber vê yekê, me mirov ji her qadê vexwendine konferansa xwe. Ev konferans girîng e, ji bo kirdebûna pêavkoyê."

 

Ayaz destnîşan kir ku partiyên kurd jî dê beşdarî konferansê bibin û got: "Nûnerên partiyên siyasî yên Bakur, Başûr, Rojava û Rojhilatê û her wiha nûnerên kesên ku li van herêman şer dikin jî dê amade bibin. Em ê ji bo komkirina kongreyeke neteweyî bi lez û bez nîqaşan bikin. Di vê serdema ku yekîtî ji her demê girîngtir e de, kombûna bilez a kongreya neteweyî ji bo têkoşînê pir girîng e. Wekî yekîtî, em armanc dikin ku pêşengiya vê yekê bikin. Wekî yekîtî, em daxwaza hevdîtina bi birêz Ocalan re jî dikin. Divê her kes ji bo pêşxistina yekîtiya di navbera kurdan de rola xwe bilîze. Divê partiyên siyasî yên kurd jî vê mijarê wekî mijareke di ser partiyan re bibînin û ji bo kombûna kongreya neteweyî têbikoşin, girseya xwe razî bikin. Em ê her tişta ku ji destê me bê em ê bikin."

 

MA / Fethî Balaman