RIHA - Parlamenterê DEM Partiyê Omer Ocalan diyar kir ku li Rojhilata Navîn siyaseta “xwînê” tê meşandin û wiha got: “Şerte ku di vê pêvajoyê de kurd bên naskirin. Weke hûn jî dibînin, bi zîhniyeta DAIŞ’ê çav berdane destekftiyên kurdan. Divê em tifaqa xwe mezin bikin.”
Rêxistina DEM Partiyê ya Curnê Reş a Rihayê li avahiya xwe kongreya xwe ya awarte li dar xist. Rêveberên DBP’ê yên bajar û navçeyan, endamên Meclisa Dayikên Aştiyê, aktîvîstên TJA’yê, Hevşaredarên Curnê Reş Serhan Paydaş û Garîp Yeşîl, Hevşaredarê Xelfetiyê Mehmet Karayilan, xwişka yek ji kadroyên pêşeng ên PKK’ê Alî Çîçek, Ayşe Çîçek û gelek partiyî tev li bûn.
Di kongreyê de pankartên “Ne qeyûm demokrasî” û “Me bi ciwanî dest pê kir dê bi ciwanî bi ser bixin” hatin daliqandin. Kongre, bi deqeyek rêzgirtinê dest pê kir.
‘EM TÊKOŞÎNA XWE MEZIN BIKIN’
Piştre jî Hevşaredarê Xelfetiyê Mehmet Karayilan axivî. Karayilan, anî ziman ku Curnê Reş di têkoşîna azadiyê ya gelê kurd de xwedî cihekî dîrokî ye û wiha got: “Em di pêvajoyeke cidî û aloz de ne. Di vî hevraziyî de rêya me kin ma ye. Hindik ma ye em govenda azadiyê bigerînin. Di vê pêvajoyê de hewceye em têkoşîna xwe mezintir bikin.”
‘ARMANCA ME EW E KU XIZMETÊ JI BO GEL BIKIN’
Hevşaredara Curnê Reş Garîp Yeşîl jî da zanîn ku di 6 mehên peywirê de rastî gelek astengkirinan hatine û ev tişt anî ziman: “Me xebatên di nava 10 salan de nehatine kirin, di nava 6 mehan de kir. Tevî ewqas astengkirinan jî xebatên me didomin. Dev ji gundan berdin, li navenda navçeyê jî pergaleke stabîlîze nehatiye avakirin. Me xizmet ji gelê xwe re kir û dê hêj bêhtir bikin.”
Hevseroka DEM Partiyê ya Rihayê Sema Aîşeoglû jî bal kişand ser dîroka têkoşînê ya Curnê Reş.
SILAVÊN ABDULLAH OCALAN JI BEŞDARAN RE GOT
Parlamenterê DEM Partiyê yê Rihayê Omer Ocalan jî bal kişand ser şerê li Rojhilata Navîn û wiha got: “Em ê siyaseta xwe li gorî paradîgmaya birêz Ocalan bimeşînin. Ev bajar, bajarê birêz Ocalan e. Wekî hûn jî dizanin me di cotmehê de bi birêz Ocalan re hevdîtinek kir. Gotibû ku tu biçî ku derê silavên min ji gel re bibe. Ez careke din silavên wî ji we re dibêjim. Şerê li Rojhilata Navîn kûr dibe û xwîn dirije.
Birêz Ocalan di hevdîtinê de got; ‘Ez li vê derê me.’ Got; ‘Heke şert û merc guncav bên avakirin, ez dikarim şer derbasî zemîna hiqûq û çareseriyê bikim.’ Lewma banga me ji bo gelê me ew e ku têkoşîna xwe mezin bike. Medyaya Tirkiyeyê şerekî psîkolojîk dimeşîne. Li Rojhilata Navîn siyaseta xwînê tê meşandin. Şert e ku di vê pêvajoyê de hebûna kurdan were naskilrin. Weke hûn jî dibînin, bi zîhniyeta DAIŞ’ê çav berdane destkeftiyên kurdan. Kurd, nûnertiya aştî û demokrasiyê dikin. Medyaya Tirkiyeyê jî derewan dike û rastiyan berevajî dike. Divê gelê me li dijî vê hişyar be û siyaseta xwe li gorî vê bike. Gelê kurd mafên tirkan, ereb, suryan û ermenan jî diparêzin. Lewma divê em partiya xwe ya siyasî, tevgera xwe bişopînin. Meseleya me, îdiaya me û fikrên me mezin in. Em kurd divê li dijî vê siyaseta ji bo tunekirina me tê meşandin têbikoşin. Divê Riha, ji bo Rojhilata Navîn û Rojava bi rol û berpirsyartiya xwe rabe. Hewceye em tifaqa xwe mezin bikin.”
Piştî axaftinan, hilbijartin hate kirin û Başak Saridal û Mehmet Paç weke Hevserokên DEM Partiyê yên Curnê Reş ên nû hatin hilbijartin.