Mizrakê ku merasîmê şopand: Divê sererastkirinên qanûnî demildest bên pêkanîn 

2025-07-15 09:27:15



	 

	AMED - Endamê Lijneya Rêveber a Baroya Amed Baver Mizrak diyar kir ku divê çekberdana Koma Aştî û Civaka Demokratîk wekî "gaveke niyeta baş" were dîtin û destnîşan kir ku pêdivî bi guhertinên bilez ên qanûnî û destûra bingehîn heye.

	 

	Li ser banga Rêberê Gelê Kurd Abdullah Ocalan, Koma Aştî û Civaka Demokratîk a ji 30 kesan pêkhatî, di 11'ê Tîrmehê de li herêma Şikefta Casenê ya Silêmaniyê ya Herêma Kurdistana Federe, bi merasîmekê çekên xwe tune kirin. Endamê Lijneya Rêveber a Baroya Amedê Baver Mizrak ku di nav kesên ku merasîmê temaşe kirin de bû, diyar kir ku Abdullah Ocalan û PKK'ê gavên berbiçav avêtine û dora dewletê ye ku gavan biavêje.

	 

	Baver Mizrak diyar kir ku wekî Baroya Amedê merasîmê şopandine û got ku Şikefta Caseneyê ku merasîma çekdaninê lê hat lidarxistin, xwedî girîngiyeke dîrokî ye, ji ber ku Mehmud Berzenci û Babanzade jî di nav de maovanî ji gelek tevgerên berxwedanê re kiriye. Mizrak diyar kir ku merasîmê nîşan daye ku Abdullah Ocalan û PKK li gorî ruhê pêvajoyê berpirsiyariyên xwe bi cih tînin û got: "Divê êdî dewlet gavên ku civakê qaneh bike û di civakê de baweriyê bidin der iavêje."

	 

	Mizrak diyar kir ku pêvajoyek tê meşandin ku di ezmûnên aştiyê yên cîhanê û çareseriyên pevçûnî yên cîhanê de tune ye û got: "Divê ev wekî gaveke niyeta baş were hesibandin." Mizrak gotina Devlet Bahçeli yên "Aştî ne kevokeke yekbaskî ye" bi bîr xist û diyar kir ku ji bo ku pêvajo bi rêkûpêk bimeşe, divê dewlet gavên qanûnî û destûra bingehîn biavêje. Mizrak destnîşan kir ku divê ev gav di çarçoveya pêvajoya entegrasyonê ya çekdarên rêxistinê û pirsgirêka kurd de bin ku bûye sedema rêxistinê.

	 

	AWAYÊ KOMÎSYONÊ

	 

	Mizrak bi bîr xist ku bêyî ku li bendê bê sekinandin gelek gav dikarin werin avêtin. Mizrak biryara Dadgeha Mafên Mirovan a Ewropayê (DMME) ya li ser Selahattîn Demîrtaş bi bîr xist û destbîşan kir ku ne hewce ye ku li bendê bê sekinandin ku ji bo berdana Demîrtaş û girtiyên din ên siyasî komîsyonek were avakirin. Her wiha destnîşan kir ku bêyî ku komîsyonek der barê girtiyên nexweş û sererastkirinên înfazê de hebe, serbestberdan dikarin werin kirin. Mizrak got: "Komîsyonên ku li meclisê de werin avakirin divê veguherin avahiyên ku her kes dikaribe nêrînên xwe lê bibêje. Divê pêvajo di ser komîsyonanê re neyê tembelkirin. Ji ber vê yekê, divê dewlet gavên ku nêzîkatiya xwe ya jidil ya ji bo pêvajoyê nîşan bide biavêje, hem di çarçoveya pirsgirêka kurd de û hem jî di entegrasyona milîtanên rêxistinê de."

	 

	‘DIVÊ PÊŞÎ LI ZEMÎNA PROVAKASYONÊ BÊ GIRTIN'

	 

	Mizrak diyar kir ku ev pêvajo ji pêşketinên li Rojhilata Navînê serbixwe nîne. Mizrak anî ziman ku di sêwirana nû ya Rojhilata Navînê de, dirêjkirina vê pêvajoya çareseriyê ya bi demê re, nemaze di serdema pevçûnên dijwar de, tenê dê pêvajoya provokasyonê xurt bike. Mizrak wiha pê de çû: "Divê gav bi lez werin avêtin; dewlet berpirsiyarê vê yekê ye." Mizrak rave kir ku Baroya Amedê bi partiyên siyasî yên li meclisê re civiya ye û ji bo beşdarbûna pêvajoyê atolye û civînan li dar xistiye. Mizrak destnîşan kir ku divê komîsyon hemû beşên civakê di nav xwe de bihewîne. Mizrak diyar kir ku nekirina vê yekê dikare bibe sedema ku pêvajo bi awayekî nehevseng bimeşe.

	 

	‘DIVÊ MAFÊ HÊVIYÊ BÊ PÊKANÎN'

	 

	Mizrak biryara "mafê hêviyê" ya DMME'yê bi bîr xist û destnîşan kir ku ji bo pêvajo bi rêkûpêk bimeşe, divê alî şert û mercên xebatê yên wekhev û azad bi dest bixin. Mizrak got: "Di vê gavê de, em nikarin bibêjin ku tecrîda li ser birêz Ocalan bi tevahî hatiye rakirin. Wekî din, ew mafê wî heye ku bi qasî ku dewlet dixwaze bi malbat, siyasetmedar û parêzerên xwe re têkilî daynin. Sererastkirinên înfazê û sererastkirinên qanûnî cewherê van hevdîtinan nîşan didin. Biryara DMME'yê ya li ser birêz Ocalan li ser cezayê girtîgehê yê herî zêde 25 sal e. Lêbelê, birêz Ocalan ji sala 1999'an vir ve 26 sal in di girtîgehê de ye. Divê ruhê vê pêvajoyê wekî helwestek ku ji bingeha misogerkirina azadiya wî ya fizîkî û şert û mercên xebatê yên azad derdikeve holê were pênasekirin. 'Mafê hêviyê' ne tenê ji bo birêz Ocalan, lê ji bo bi hezaran kesên ku cezayên giran ên heta hetayê girtine jî derbasdar be. Ev rêzikname dikare wekî nîşanek vê rêziknameyê jî were hesibandin."

	 

	Mizrak diyar kir ku divê hemû beşên civakê di vê pêvajoyê de cih bigirin û got ku gelê herêmê û raya giştî ya kurd ji bo vê yekê amade ne û ew bawer dike ku ger enerjiya li vir bigihê rojavayê Tirkiyeyê, pêvajo dê serkeftîtir be.

	 

	MA / Mujdat Can